Ѭ

Ѭ, ѭ (jotovany veliky jus, v glagolici: Ⱙ) je arhaična kirilična bukva, nyně upotrěbjajema samo v crkovnoslovjanskyh literugičnyh tekstah. Ona je jotovany odpovědnik Ѫ (velikogo jusa), ligatura toj bukvy s І. V starocrkovnoslovjanskom jezyku ona prvopočetno označala jotovanu nosovu samoglasku [jɔ̃]. V naučnyh transliteracijah iz starocrkovnoslovjanskogo, a takože v rekonstrukcijah praslovjanskogo, ona obyčno prědstavjaje se kako jǫ, v medžuslovjanskom etimologičnom alfabetu kako jų.

Od 10. i 11. stolětij nosovy izgovor jusov propadl v starovozhodnoslovjanskom i starosrbskom, sovpadajuči s izgovorom Ю v slučaju jotovanogo velikogo jusa; jediny slovjansky jezyk, v ktorom nosovy izgovor shranil se do dnes, je poljsky, ktory v pozicijah starogo jotovanogo velikogo jusa imaje kombinacije ją ili ję. Na polovině 12. stolětja veliky jus sovsim izčeznul v jezyku Rusi. V 15. stolětju on ponovno pojavil se začasno pod vlivom bulgarsko-rumunskoj pismennosti, v 17. stolětju izčeznul definitivno.

V drugoj polovině 19. stolětja, v času narodnogo vozrodžen‌ja, Ѫ i Ѭ vratili se v bulgarskom jezyku pri tvorjenu novogo literaturnogo jezyka, po prikladah iz staroslovjanskyh rukopisov, ačekoli nosovy izgovor istnoval samo v několikyh narěčjah v nyněšnjej Greciji. Ѭ bylo upotrěbjeno do 1910-yh lět, Ѫ izčeznulo iz bulgarskoj azbuky pri reformě 1945 g. i bylo zastupjeno bukvoju Ъ.

Kodovan‌je

Kodovan‌je		Ѭ	ѭ
Nazva v Unikodu		CYRILLIC CAPITAL LETTER IOTIFIED BIG YUS	CYRILLIC SMALL LETTER IOTIFIED BIG YUS
Unikod	šestnadseterična sistema	U+046C	U+046D
	deseterična sistema	1132	1133
HTML	šestnadseterična sistema	Ѭ	ѭ
	deseterična sistema	Ѭ	ѭ
UTF-8		D1 AC	D1 AD

Vněšnje linky

• "U+046C Cyrillic Capital Letter Iotified Big Yus". codepoints.net (na anglijskom).
• "U+046D Cyrillic Small Letter Iotified Big Yus". codepoints.net (na anglijskom).