Ӧ (kirilica)

Ӧ, ӧ (O s umlautom ili O s tremoju) jest kirilična bukva upotrěbjajema v někojih uralskyh i turkijskyh jezykah. Osoblivo za permsku grupu uralskyh jezykov, tuta bukva jest mnogo harakteristična. V Syktyvkaru, glavnom gradu Republiky Komi, nahodi se od 2011 g. Pametnik bukvě «ӧ».

V komi-zyrjanskom i komi-permjačskom jezykah, ona označaje samoglasku [ɘ] ili [ǝ], v komi-jazvinskom samoglasku [ɵ], a v udmurtskom samoglasku [ʌ]. Iz ostalyh uralskyh jezykov, ona takože upotrěbjaje se v marijskyh jezykah (izgovor: [œ]), v někojih dialektah hantyjskogo jezyka (izgovor: [ø]) i selkupskom (izgovor: [ɘ]). Narymsky dialekt selkupskogo jezyka takože imaje (malo razprostranjeny) dolgy variant tutoj bukvy: Ӧ̄. V 1979–1982 lětah bukva ӧ byla koristana v alfabetu kildinsko-saamskogo jezyka.

Turkijske jezyky upotrěbjajuče bukvu Ӧ sut altajsky, hakassky, gagauzsky, šorsky i urumsky. V njih ona označaje prědnju samoglasku [ø]. Večinstvo turkijskyh jezykov, jednakože, za tutoj zvuk koristaje drugu kiriličnu bukvu, imenno: Ө.

Nakonec, v Iranskom jezyku kurdsky bukva Ӧ prědstavjaje zvuk [œ].

V russkoj prědrevolucijnoj ortografiji, bukva Ӧ koristala se za prědstavjenje zvukov [ø] ili [ǝ] iz turkijskyh jezykov, napr. Карагӧль (iz turkmenskoj nazvy Garagöl). Poněkogda ona takože koristaje se za prědstavjenje izgovora latinskoj bukvy ö v učebnikah němečskogo jezyka, napr. Кӧльн «Köln».

Ačekoli tuta bukva ne naleži k nijednoj medžuslovjanskoj azbuky, ona može služiti za kirilizaciju latinskoj bukvy ö.

Kodovanje

Kodovanje		Ӧ	ӧ
Nazva v Unikodu		CYRILLIC CAPITAL LETTER O WITH DIAERESIS	CYRILLIC SMALL LETTER O WITH DIAERESIS
Unikod	šestnadseterična sistema	U+04E6	U+04E7
	deseterična sistema	1254	1255
HTML	šestnadseterična sistema	Ӧ	ӧ
	deseterična sistema	Ӧ	ӧ