Bezdna (religija)

V Bibliji, bezdna jest neizměrimo gluboko ili bezgranično město. Termin proizhodi iz grečskogo slova abyssos (davnogreč.: ἄβῠσσος) "gluboky, neizměrimy, bezgraničny", ktoro jest prěvod hebrejskyh slov tehóm (תְּהוֹם "gluboky, prazdny"), ṣulā (צוּלָה "gluboky kako morje, gluboky potop") i imene morskogo čudovišča rahab (רחב "prostorno město; jarost, svirěpost, nadutost, gordost"). Pojavjaje se v Septuagintě, ktora jest najstarši grečsky prěklad židovskoj Biblije, i v Novom Zavětě.

Biblijsko upotrěbjen‌je

V prvopočetnom smyslu hebrejskogo tehóm, bezdna odnosila se k prvotnym vodam ili haosu, iz ktorogo byl stvorjen oporedčeny svět: «tma byla nad licem bezdny» prěd stvorjen‌jem světa. Termin takože mogl odnositi se doslovno do glubiny morja, glubiny zrla ili vnutrnosti Zemje.

Kniga Jony pokazyvaje izkušen‌je blizko smrti proroka i jegov shod v bezdnu.

V psalmu 42:7 «bezdna zove bezdnu» (odnosno vody), ili na latinskom: abyssus abyssum invocat, razvivajuči temu žednosti duše za Bogom.

V pozdnějšem razširjenom smyslu v medžuzavětnoj židovskoj literaturě bezdna byla podzemny svět, ili prebyvališče mrtvyh (Šeol) ili, nakonec, carstvo odmetnenyh duhov (upadših angelov) (peklo). Osoblivo v poslědnjem smyslu bezdna često byla viděna jako vezen‌je za demonov.

Tuta upotrěba vratila se Novom Zavětě. Suglasno Evangel‌ju po Lukě, Isus poslal gadarensku svinju v bezdnu (Luka 8:31). Pavel iz Tarsa upotrěbjaje termin v Rimjanah 10:7, citujuči Devteronomij 30:12-14 i odnoseči se do prěbyvališča mrtvyh (gledite takože psalm 71:20). Bezdna takože priměnjaje se několikokrat v Knigě Objavjen‌ja kako město, iz ktorogo vyhodet saranče i zvěr iz morja (Objavjen‌je 9:1–11; 13:1; 11:7), i ktoro služi kako vezen‌je za sedmiglavogo drakona v době Tysečlětja (Objavjen‌je 20:3). V Objavjen‌ju 9:11 Abaddon jest nazvan «angel bezdny» i to město igra rolju v zaključen‌ju historije i konečnom odvětě Boga na zlo.

V hristijanskoj teologiji

Kassiodor povezyvje frazu «bezdna zove bezdnu» (psalm 42:7) so vzajemnym svědočstvom oboh Zavětov: Starogo Zavěta prědkazyvajučego Novy, a Novogo Zavěta izpolnjajučego Stary.

Papa Grigorij XVI črpe iz «bezdonnoj jamy» v svojej kritikě tyh, ktori izstupajut za «svobodu sověsti», ktora po jegovomu mněn‌ju je «absurdno i zabludno tvrdžen‌je». Ako by dana byla svoboda pozvoljajuča ljudam věriti v to, čto hočut, otvorjena byla by «jama», iz ktoroj avtor Knigy javjen‌ja «viděl voznoseči se dym»: «Odtud prihodet prěobražen‌je umov, korumpovan‌je mladeži, prěziran‌je sakralnyh věčij i svetyh zakonov — drugymi slovami, mor smrtonosnějši za državu, než vsaky iny».

Gnostično upotrěbjen‌je

O početku světa, tekst upotrěbjany v gnosticizmě, tvrdi, že pri koncu světa arhonti budut kydneni Sofijeju v bezdnu za jihnu nespravědlivost. Tamo oni budut bojevati medžu soboju, dopoka ne ostane jedino glavny arhont i ne obrati se on protiv sobě.

Izvor

• Tutoj članok imaje prěvod iz članka «Abyss (religion)» v Vikipediji na anglijskom (spis avtorov; dozvoljen‌je CC BY-SA 4.0).