Hedonizm

Hedonizm jest skupnost filozofičnyh pogledov, za koje radost i prijatnost sut najglavne prioritety v životu. Psihologičny hedonizm jest teorija, že libokako člověčsko postupanje jest motivovano želanjem maksimalizovati radost i minimalizovati bolj. Kak forma egoizma, ona prědpoklada, že ljudi jedino pomagajut jedin drugomu, ako li oni očekyvajut personalnu izgodu i korist. Aksiologičny hedonizm jest pogled, že radost jest jedinstveny iztočnik vnutrnoj cěnnosti. On utvrdžaje, že ine prědmety, kak sut znanje i finansove resursy, jedino imajut cěnnost dopoka mogut izrabatyvati radost i snižati bolj. Tute pogledy dělet se na kvantitativny hedonizm, koj jedino bere v obzor intensivnost i dolgost radosti, i kvalitativny hedonizm, koj identifikuje kvalitet kak ješče jedin značimy faktor. Srodnu poziciju ima prudencialny hedonizm (takože znany kak hedonizm blagostanja), koj uvrdža, že radost i bolj sut dva jedinstvene faktory v blagostanju. Etičny hedonizm prikladaje aksiologičny hedonizm do morala, utvrdžajuči, že ljudi imajut moralnu povinnost slědovati za radostju i izběgati bolja. Utilitarne versije utvrdžajut, že cěljem jest uveličenje občego ščestja za vsih, podčas kak egoistične versije govoret, že každy člověk jest povinen prěslědovati jih sobstvenovlastnu radost. Vně akademičskogo konteksta, hedonizm jest poněkogda zrimy kak unizitelny termin za egoističny stilj života, koj jedino hoče kratkoterminovo zadovoljenje.

Proizhodženje pojetja

Slovo hedonizm proizhodi od starogrečskogo slova ἡδονή (hēdonē), čto znači "radost", "prijatnost", "zadovoljenje".

Vněšnje linky

• Tutoj članok imaje prěvod iz članka «Hedonism» v Vikipediji na anglijskom jezyku (spis avtorov; dozvoljeńje CC BY-SA 4.0).