Kror

Kror (hindi: करोड़ karoṛ, tam.: கோடி kōṭi, ang.: crore) jest čislo koristajemo v južnoj Aziji za označenje deseti milionov (10⁷). Jedin kror sostoji iz sta lakhov. Tym sposobom oficialno upotrěbjajut se čisla v Indiji, Bangladešu, Nepalu, Sri Lankě, Pakistanu i Mjanmaru. Tako i pišut se sumy grošev v indijskyh rupi, napr. ₹ 3,00,00,000 znači: 3 krory rupi.

Čisla povyše tyseča pišut se v grupah dvoh (zaměsto treh) desetičnyh měst, takto punktacija v čislah razni se od evropejskoj. Kromě togo koristajut se ne točky (kako v večinstvu slovjansky jezykov), ale zarezky (kako v anglijskom). Takym sposobom pišut se:

1 hazar = 1,000 «tyseč»
1 lakh = 1,00,000 «sto tyseč»
1 kror = 1,00,00,000 «deset milionov».

Slovo «milion» ne jestvuje ni v indijskyh jezykah, ni v anglijskom upotrěbjajemom na indijskom subkontinentu.

Etimologija

Slovo kror proizhodi od sanskritskogo slova कोटि कोटि kōṭi, ktoro takože označalo čislo 10 milionov. Sučasna forma karor, upotrěbjajema v tomže značenju v mnogyh jezykah Indije, jest rezultat fonetičnoj evolucije prakritskogo ekvivalenta kroḍi, ktory byl pozajety v indijsku versiju anglijskogo jezyka v formě crore.