Medžuslovjanska Vikipedija
Vikipedija na medžuslovjanskom jezyku, krače medžuslovjanska Vikipedija, jest izdanje Vikipedije na medžuslovjanskom jezyku. Ona byla stvorjena 24 junija 2026 g., a tutčas sodrživaje 1,625 stranic.
Historija
[praviti | praviti izvorny kod]Ranějše viki
[praviti | praviti izvorny kod]Medžuslovjansky jezyk povstal v lětah 2011–2017 na osnově treh starějših projektov slovjanski (2006), slovioski (2009) i novoslověnsky (2010). Uže v eksperimentalnoj fazě, v 2007 g., narodila se ideja enciklopedije po modelu Vikipedije na jezyku slovjanski. V juniju onogo goda prva viki (slp.wikia.com) byla založena Gabrielom Svobodoju na bezplatnoj platformě Wikia za jegovu versiju slovjanskogo bez padežev, slovianski-P.[1] V tutoj viki byl napisany najstarějši članok nyněšnjej medžuslovjanskoj vikipedije: Marko Polo. V 2011 g. ona sodrživala 24 članky.[2] V avgustu 2007 g. pojavila se kopija na platformě editthis.info/slp, ktora nikogda ne byla aktivna, ale v protivnosti k drugym starějšim medžuslovjanskym viki jestvuje dodnes i shranili se v njej někoje prvonačelne članky napisane na slovianski-P.[3]
V dekembru 2009 g. občina projekta slovianski rěšila, že zaměsto eksperimentalnyh versij slovianski-N i slovianski-P naturalistična versija bude oficialna. V tomže měsecu Jan van Steenbergen založil novu viki slovianski.wikia.com, vključajuči v nju takože članky iz prědhodnoj viki na slovianski-P.[4] Kogda tuta viki byla zatvorjena v januari 2013 g., ona iměla 122 člankov.
Susědny projekt slovioski, ktory prvopočetno iměl stati ulěpšenoju formoju jezyka slovio, započel v 2009 g. vlastnu viki na slovioski.wikia.org. Iměla 28 člankov, někoje srěd njih byli pozdněje importovane v medžuslovjansku viki.[5] Kromě togo, za rabotu nad leksikonom byla založena oddělna viki, slovknig.wikia.com.[6]
Poslě zatvorjenja medžuslovjanskoj viki na Wikia, jej sodržanje blukalo po raznyh platformah: najprvo isv.wikinet.org od januara 2013 g.,[7], a potom isv.orain.org od oktobra 2014 g. Obě platformy iměli seriozne problemy s bezpečnostju i stabilnostju, a v septembru 2015 g. server Orain upadl na amen.[8] Toliko v maju 2017 g. koristnik Lev založil novu viki pod nazvoju Medžuviki s domenom isv.miraheze.org. V aprilju 2024 g., kratko prěd otvorjenjem medžuslovjanskoj vikipedije v Inkubatoru, ona iměla 457 člankov.[9] V 2018 v tutu viki takože bylo prěneseno sodržanje Vikisbornika (kolekcije medžuslovjanskyh tekstov), založenogo v 2016 g. na domenu medzuslovjanski-vikisbornik-interslavic.wikia.com.
Inkubator
[praviti | praviti izvorny kod]V aprilju 2024 g. medžuslovjanskomu jezyku byl priznany kod ISO 639-3 isv.[10] To označalo, že bylo izpolnjeno važno uslovje za stvorjenje istinnoj vikipedije na medžuslovjanskom. 8. maja koristnik Wojsław Brożyna sdělal formalno podanje na Meta-Wiki[11] i v tojže denj založil takože testnu viki v Wikimedia-Inkubatoru.[12] V tečenju prvyh měsecev bylo v njim malo aktivnosti, ibo vsa aktivnost ješče odbyvala se v Medžuviki, kde byl interfejs na medžuslovjanskom i dobro funkcionujuči transliterator. Toliko v avgustu, kogda cěly interfejs byl ponovno prěveden na medžuslovjansky i translitator iz Medžuviki byl prěnesen, viki v inkubatoru načela se razkručati. Večinstvo člankov iz Medžuviki bylo ručno prěnesenyh, a načeli se takože pojavjati nove članky. 29. maja 2025 byl napisan tysečny članok (ne včisljajuči prěnapravjenja).[13]
31. oktobra 2024 g. Jezyčny komitet (LangCom) postanovila, že projekt medžuslovjanskoj vikipedije jest eligible, čto znači, že poddomen može byti stvorjen pod uslovjem, že sut aktivna občina i prěvedeny interfejs.[14] 23 junija 2026 projekt byl odobrjeny jezyčnym komitetom,[15], a uže v tojže sam denj medžuslovjanska vikipedija byla stvorjena.
V dnju prěhoda s inkubatora na vlastny poddomen (23 junija 2026) medžuslovjanska Vikipedija iměla:[16]
- 4419 stranic (vključno s kategorijami, šablonami, prěnapravjenjami i besědnymi stranicami)
- 2968 stranic v glavnom imennom prostoru: 1528 člankov i 1440 prěnapravjenij.
- 175 redaktorov (iz ktoryh 49 iměli veče neželi 100 pravok)
- 23511 pravok.
Okolo 2/3 vsih člankov byli napisane latiniceju, okolo 1/3 kiriliceju.
Iztočniky
[praviti | praviti izvorny kod]- ↑ "Slovianska Viki – Glovna stronica / Гловна строница". slp.wikia.com. Bylo arhivovano iz iztočnika 7 julija 2007.
- ↑ "Slovianska Viki – Glovna stronica / Гловна строница". slp.wikia.com. Bylo arhivovano iz iztočnika 27 avgusta 2011.
- ↑ "All pages". editthisinfo.slp. Data dostupa: 31 maja 2025.
- ↑ "Slovianska Wiki: Glavna stranica/Главна страница". slovianski.wikia.com. Bylo arhivovano iz iztočnika 26 januara 2012.
- ↑ "Slavic Wiki". slovioski.wikia.com. Bylo arhivovano iz iztočnika 19 julija 2012.
- ↑ "Slovknig Wiki". Data dostupa: 31 maja 2025.
- ↑ "Medžuslovjanska Vikipedija: Glavna stranica". isv.wikinet.org. Bylo arhivovano iz iztočnika 30 maja 2014.
- ↑ "Miraheze history". meta.miraheze.org. Data dostupa: 31 maja 2025.
- ↑ "Medžuviki. Svobodna enciklopedija". isv.miraheze.org. Bylo arhivovano iz iztočnika 17 aprilja 2024.
- ↑ "isv". SIL International: ISO 639-3. 3 aprilja 2024. Data dostupa: 23 aprilja 2024.
- ↑ "Requests for new languages/Wikipedia Interslavic". meta.wikimedia.org. Data dostupa: 31 maja 2025.
- ↑ "Interslavic Vikipedija". incubator.wikimedia.org. Data dostupa: 1 junija 2025.
- ↑ "Tyseč člankov!". incubator.wikimedia.org. 30 maja 2025.
- ↑ "Requests for new languages/Wikipedia Interslavic". 30 oktobra 2024.
- ↑ "Requests for new languages/Wikipedia Interslavic". 23 junija 2026.
- ↑ "Catanalysis". meta.toolforge.org. Data dostupa: 24 junija 2026.