Prěrodženje
Prěrodženje, takože Reinkarnacija ili Transmigracija jest nazvoju teorije o tom, že ljudi rodet se ponovno v drugom tělu poslě smrti i tutoj krug prodolžaje se podčas mnogyh životov. Prěrodženje ili transmigracija jest preferovanym terminom za tyh věrečih, ktori ne věret v věčne duše. Mnogi hinduisti, džainisti, keltske pogani, budisti, i poslědovatelji něktoryh afrikanskyh kultov věret v reincarnaciju ili prěrodženje/transmigraciju. Latinsky korěnj carn- označaje "plot", "tělo", incarnacija "vpločenje", "vtěljenje", a reincarnacija "prěvtěljenje", "prěvpločenje".
Věra v reinkarnaciju ili prěrodženje/transmigraciju
[praviti | praviti izvorny kod]Tuta věra jestvuje vo mnogyh věrozakonah pomimo Islama i hristijanstva, hoti od 20 do 30 procentov hristijan v zapadnyh krajinah takože věret v reinkarnaciju.[1]
Narodoznavci sut dokumentovali tutu věru posrěd priblizno vsih tradicijnyh religij u etničnyh skupin v Afrikě, Sěvernoj i Južnoj Amerikah i Avstraliji/Okeaniji. Plemena sěverozapadnoj Sěvernoj Ameriky prodolžajut věriti v reinkarnaciju bez obzira na negativno odnošenje k njej od česti hristijanskyh misionarev i crkvij.[1]
Reinkarnacija v hinduizmu
[praviti | praviti izvorny kod]Hinduisti věret v reinkarnaciju, proces, pri ktorom duša mnogokratno zajmaje fizično tělo črěz rodženje na Zemji. Drěvne pisanja hinduizma, od početka priblizno 700 lěta do n.e. učet, že duša, ili bezsmrtno “samo” (atman), prijmaje rodženje raz za razom. Duša žive i prodolžaje svoj dolgy put, dopokud ona se ne stane jedinoju s Bogom. Hindus věri, že duša nikogda ne umiraje, no vseljaje se v jedno tělo za drugym podolg svojego evolucijnogo putovanja, napravjajemogo karmoju. Karma (bukvalno: dělanje) jest sumoju dějanij duše, i siloju, ktora oprěděljaje jej dalšu reinkarnaciju.
Duša razvivaje se od nezrělosti k duhovnomu prosvětljenju. Zatom, vsaka reinkarnovana duša sebe izbiraje dom i rodinu, kde ona bude mogti izpolniti svoj dalši krok učenja se i dozrěvanja. Každy život na Zemji jest podobny do klas v školě. Dozrěvanje duše na Zemje znači izpolnjanje jej světskyh želanij, ktore jedino mogut byti izkušajeme črěz tělo.[2]
U smrti duša ostavjaje fizično tělo. Ale duša ne umiraje. Ona ostavaje žiti v subtilnom tělu, nazyvanom astralnym tělom. Astralno tělo jestvuje v ne fizičnom izměrjenju, ktoro nazyvajut astralnym planom ili světom. Tu duša prodolžaje iměti prěživanja, dopokud ona se ne narodi v drugom fizičnom tělu kako novorodženo dětetko.[3]
Poslě mnogyh životov, slědujuči dharmě (pravilnoj metodě žitja), duša vpolno dozrěvaje v ljubvi, mudrosti i vědě Boga. Vyše ne jest potrěba za fizično rodženje, zatože vse pouky sut naučene, i vse karmy sut izpolnjene. Kogda vse želanja izčezajut, osoba se vyše ne bude narodžati.[4]
Izslědovanje reinkarnacije
[praviti | praviti izvorny kod]Ian Stevenson jest odkryl, že najlěpše dokazy, poddrživajuče věru v reinkarnaciju, prihodet iz slučajev malyh dětij, ktori, obyčno vo věku od 2 do 5 lět, tvrdet o prědhodnom žitju, ktoro oni sut iměli prěd narodženjem.[5] Priblizno 35 procentov tutyh dětij takože imajut vrodžene defekty, odpovědajuče poranjenjam ili bolěznjam, izkušenym pokojnoju osoboju, ktoru pomni subjekt. Lěkarske dokumenty sut potvrdili taku suglasnost v povyše než četyrideseti slučajah.[1]
Linky i referencije
[praviti | praviti izvorny kod]- 1 2 3 Henry, Jane (2005). Parapsychology: Research on Exceptional Experiences. Psychology Press. str. 224. ISBN 978-0-415-21360-8.
- ↑ Sm. Bhagavad Gita XVI.8-20
- ↑ Satguru Sivaya Subramuniyaswami. "Ten Questions people ask About Hinduism …and ten terrific answers!(p. 4)" (PDF). Bylo arhivovano iz iztočnika (PDF) 11 aprilja 2007.
- ↑ Rinehart, Robin (2004). Contemporary Hinduism: Ritual, Culture, and Practice. ABC-CLIO. ISBN 1-57607-905-8.
- ↑ Henry, Jane (2005). Parapsychology: Research on Exceptional Experiences. Psychology Press. str. 225. ISBN 978-0-415-21360-8.
Vnešnje linky
[praviti | praviti izvorny kod]- Tutoj članok sodrživaje prěklad iz članka «Reincarnation» v Vikipediji na prostom anglijskom (spis avtorov; dozvoljeńje CC BY-SA 4.0).