Vikipedija:Čto Vikipedija ne je

Vikipedija je enciklopedija: vse stranice v glavnom prostoru Vikipedije sut enciklopedične članky, a vse ostale stranice služet k pomagan‌ju procesu jih tvorjen‌ja. Jednakože to ne znači, že cělj Vikipedije jest sodrživan‌je cělogo ljudskogo znan‌ja. Občina koristnikov razrěšaje, čto jest i čto ne jest dopustimo. Proiztekajuče ograničen‌ja sut rezumovane na tutoj stranici.

Sodržan‌je

Vikipedija ne je:

Papirna enciklopedija. Nemaje praktičnyh ograničenij ni v kolikosti, ni v razměru člankov. Suglasno peti kolon Vikipedije jednakože istnujut oprěděljene ograničen‌ja čto se tyče prědmetov i sodržan‌ja člankov.
Slovnik. Enciklopedija povinna je prědstaviti znan‌je, ideje i razuměn‌je, ale ne objasnjaje slova kako to dělajut slovniky. Iz toj pričiny članky v Vikipediji ne sostojet ni iz samyh definicij slov, ni iz opisov ob etimologiji ili upotrěbě slov. Take opisy mogut byti čest članka, ale ne izključiteljno. Očevidno, na početku vsakogo članka povinen nahoditi se kratko oprěděljen‌je prědmeta.
Baza danyh. Čislny material, napriklad měrjen‌ja, statistiky, rezultaty izborov ili sportnyh mečev, absolutno mogut byti čest članka, ale ne imaje pravo istnovati kako samoistny članok. Tabely imajut smysl samo togda, kogda sut uměščene v pravom kontekstu.
Sbor vněšnjih linkov. Samorazumno vněšnje linky do glavnyh izvorov o prědmetu danogo članka sut potrěbne, da by čitatelji mogli najdti veče informacije o njim, ale krajno dolge spisky linkov na ine sajty sut nepožedane. Napriklad: deset linkov v članku treh redkov bylo by neproporcionalno.
Provodnik. Vikipedija opisyvaje prědmety, ale ne davaje instrukcije, sověty, sugestije, prědložen‌ja, recepty i tako dalje.
Spisok tekstov ili citatov. One mogut byti čest poněkojih člankov, ale samo kako dodatok i vsegda s pridrživan‌jem se avtorskyh prav. Vlastne teksty ili prěvody poem, pěsnjej i prozy mogut byti publikovane v Vikisborniku.
Novinarsky portal. Vikipedija ne služi za publikovan‌je informacij iz prvoj ruky ili vlastnogo izkušen‌ja i ne povinno je běgati za aktualnymi sobytjami. Važne sobytja možno je opisati pod uslovjem, že črěz dolžejši čas sut opisane v raznyh serioznyh, avtoritetnyh izvorah. Za točny, balansovany opis trěba uměti oddaliti se od prědmeta i različati medžu važnymi i podrednymi elementami, faktami i domyslami, pričinami i naslědkami.
Město za naučne traktaty i monografije. Ačekoli mnogo člankov tyče se naučnyh prědmetov, sodržan‌je v občem je odnositeljno menje podrobno i povinno je byti napisano tako, že daže laik može razuměti.
Město za prědstavjen‌je novyh idej, teorij ili iznahodok. Vikipedija je sostavjena iz značimogo, uže publikovanogo znan‌ja. Nove ideje, hipotezy i produkty kvalifikujut se samo pod uslovjem, že najprvo sut široko opisane v nezavisnyh, avtoritetnyh izvorah.
Podium. Vsaka enciklopedija sodrživaje biografije osob, tako i Vikipedija. Jednakože biografija oprěděljenogo člověka je dopustima samo pod uslovjem, že ta osoba imaje enciklopedičnu značimost. Cělj Vikipedije je pisati o znanyh ljudah i temah, a ne pričiniti, da by oni stali znani. Pisan‌je o sobě, svojej organizaciji ili svojih tvorbah – ačekoli ne je strogo zabranjeno – odsovětuje se, ibo v praktikě pridrživan‌je se nevtralnoj točky zrěn‌ja je mnogo trudno. Očevidno, koristniki Vikipedije mogut prědstaviti sebe na svojih koristničskyh stranicah.
Platforma za propagandu. Članok može prědstaviti stanovišča različnyh grup, čto v slučaju kontroversijnyh tem daže je neobhodimo, ale prěvaga jednoj točky zrěn‌ja nad drugymi je nepožedana. Usilujemy do maksimalnoj objektivnosti i nevtralnosti, pri čem ravnovaga medžu raznymi točkami zrěn‌ja je osoblivo važna. Kontroversijne tvrdžen‌ja imajut byti dobro dokumentovane i opirati se na avtoritetnyh izvorah.
Město za reklamu. Članky o firmah i produktah sut v poredku, pod uslovjem, že sut napisane nevtralno i bez naměra prodan‌ja čegokoli. Prědmety takyh člankov imajut byti prověrime v avtoritetnyh izvorah, nezavisnyh od samoj organizacije. Članky o malyh ili «garažnyh» prodavcah pravdopodobno budut odstranjene. Članky ne hvalet firmy ili produkty, ne podavajut cěny i ne linkujut na sajty, ktore sut izključiteljno směrjene na prodaž.
Kristalna kulja. Vikipedija ne prědpovědaje budučnost i ne je město neprověrimyh spekulacij. Spomněn‌ja o budučih sobytjah sut dopustime samo togda, kogda nastupjen‌je oprěděljenogo sobytja je (skoro) bezsporno i informacija o njim bazuje se na dostatočnoj kolikosti nezavisnyh, avtoritetnyh izvorov.

Občina

Vikipedija takože ne je:

Besědny forum o inyh prědmetah neželi o enciklopedičnom sodržan‌ju. Izključen‌jami sut Krčma i besědne stranice koristnikov, ale daže tamo cěljem razgovorov je ulěpšen‌je enciklopedije. Čatovan‌je je možno v naših grupah na DiscorduДискорду, FacebookuФејсбуку ili Telegramu.
Město do stavjen‌ja pytanij. Kto piše v Vikipediji děli se informacijeju o danom prědmetu i ne stavi pytan‌ja o njim. Črvene linky v člankov sut pozvan‌ja do napisan‌ja novogo članka, ne do uměščen‌ja pytalnyh znakov.
Spoločny eksperiment. Vikipedija ne je ni anarhija, ni demokracija, ni bjurokracija. Projekt je samoregulujuči, pravila sut ograničene do minimum, rěšen‌ja prijmaje se glavno posrědstvom iskan‌ja konsensusa. Jedine pravila, ktoryh vsaky koristnik je povinen se držati, sut oprěděljene v peti kolonah Vikipedije. Očevidno, zabranjene sut dějstva, ktore otegčajut funkcionovan‌je projekta ili sut protivne netiketě.
Obvezok. Vsaka rabota nad Vikipedijeju je dobrovoljna. Nikto ne može prinuditi drugogo koristnika do čegokoli, a vsaky koristnik imaje pravo završiti svoju dějateljnost ili sdělati sobě pauzu.
Nakonec, Vikipedija na medžuslovjanskom jezyku ne je konkurent za Vikipedije na drugyh slovjanskyh jezykah, ni za Vikipedije na drugyh umětnyh jezykah. My hočemo služiti kako cěnno dopolnjen‌je drugym slovjanskym Vikipedijam, podavajuči obširnu, razumlivu informaciju, ktora v drugyh slovjanskyh projektah je odsutna ili slabo prědstavjena, a takože sodrživati kratše, sžete i legko pročitajeme članky o prědmetah, ktore v slovjanskyh ekvivalentah sut opisane v dolgyh i često prěmnogo podrobnyh člankah.