Vikipedija:Prědpokladajte dobru volju
Prědpokladanje dobroj volje jest važna čest prace v Vikipediji. To znači mysljenje, že ljudi imajut dobre naměry, kogda dělajut něčto (napriklad pravet, komentujut itd.), navet jestli to se konča grěškoju. Věrimo, že večinstvo ljudij, pracujučih tu, hčut pomogti Vikipediji, zato pozvaljamo skoro vsekomu ju praviti. Tuta věra musi byti razděljena vsekym, za blago projekta. Jestli by to ne byla pravda, uspěšny projekt kako Vikipedija by ne istnoval.
Jestli mnite, že někto se pogrěšil, sileči se pomogti projekty, popravite jegovu hybu bez grubosti. Jestli vy ne soglašate se s někym, pametajte, že on mni, že pomaga. Koristite stranicu besědy, da byste něčto objasnili, i dajte inym šans dělati tože. To može odvratiti konflikt i ne pozvoliti, že problemy se pogoršet.
Imajte trpělivost s novymi redaktorami a ne gryzite jih. Vikipedija se odliča od večinstva kultur i občin i mnogi mogut ne věděti kako my pracujemo. Mogut se myliti ili ne považati pravila občiny. Novy redaktor može mněti, že pravilo jest potrěbno izměniti, da by odpovědalo jegovoj izkušenosti v inom městu. Takože mnogi novi redaktori mogut byti znalcami ili iměti znanja, koristne za naš projekt. Ti ljudi samo hčut pomogti.
Prědpokladanje dobroj volje se tyče naměrov (začto ljudi to dělajut), a ne dějanij (čto dělajut). Ljudi, sileči se pomogti, poněkogda se mylet i jest potrěbno popravjati jihne grěšky. Ale ne jest potrěbno mysliti, že cěljem jihnyh grěšek jest niščenje ili vandalizm. Popravite jihnu grěšku, ale ne budte grubi i ne gryzite jih. Věrojetno se ne suglasite so vsekym tu. Navet jestli někto se myli, to ne znači, že hče pogoršiti Vikipediju. Može navet se kazati trudno pracovati s něktorymi ljudami. To takože ne znači, že se silet pogoršiti Vikipediju. Nikogda ne jest potrěbno prědpokladati, že dějanja redaktora imajut zlu volju, navet jestli zla volja izdava se očevidnoju, zato že vračenje i blokovanje može se izpolniti po pričině dějanja, a ne naměra.
Tvrdženje o tom, že ina strana v konfliktu ne prědpoklada dobru volju, može byti formoju neprědpokladanja dobroj volje.
Tuto pravilo ne trěbuje, že redaktori prědpokladajut dobru volju, kogda jest očevidno, že někto ima zlu volju. Dějanja, ne odpovědajuče dobroj volji, vključajut vandalizm, pritvorne konta i krivdženja. Prědpokladanje dobroj volje takože ne znači, že dějanja redaktorov ne jest potrěbno kritikovati, ale tu kritiku ne jest potrěbno pripisyvati zlosti, jestli nema točnogo priklada zlosti.